谢安琪古天乐会再合作？《兄弟帮》拍片拉票阿Sa同祖蓝撞样

2018-12-14 19:40 https://www.yybnet.net/

今日快报

追梦十年毋忘初心杨潮凯获无线颁老人牌

参演过无数剧集的艺人杨潮凯，不知不觉已经喺无线捱咗十年，佢寻日喺社交网上载一张无线赠送的金牌相片，盒入面印上「杨潮凯#服务十周年电视广播有限公司谨此致谢 2018」，佢亦感性留言：「追梦十年，毋忘初心，庆幸今天仍能保持当初的信念，从没动摇。」

杨潮凯仲多谢帮过佢嘅伯乐及同事：「感恩在追梦路上遇上很多伯乐，感谢你们给予的机会。亦庆幸遇上志同道合的伙伴，互相勉励，互相扶持，一起成长。」

面形撞到嘭嘭声！阿Sa变身法官同祖蓝撞样

艺人蔡卓妍（阿Sa）与周柏豪、卢巧音、郑希怡、J.Arie （雷深如）等赶拍英皇电影《感动她77次》，阿Sa就喺社交网上载拍摄时影的花絮相，见阿Sa戴上法官用的假发，留言话：「其实呢顶嘢?我真系点戴都唔好睇」，仲自嘲自己圆面、个帽形同个面形撞到嘭嘭声，更笑言一早已接受不会打Botox。不过网友睇到嘅唔系呢啲，系话阿Sa戴起法官假发个样激似王祖蓝，骤眼睇又真系有几分相似嘅。

其实祖蓝个样好百搭，继黄光亮、《全美一叮》Angelica「父女撞样」、薛家燕后，又撞样阿Sa，不过讲到最似有一个人无人能及，嗰个就系佢阿妈啦！

另外，阿Sa都有上载穿上大学毕业袍的照片，笑言自己唔知第几次毕业，见同场的周柏豪、卢巧音、郑希怡、J.Arie 笑得咁开怀，一睇就知佢哋拍得几开心啦！

节目三度获提名《兄弟帮》约齐人拍片拉票

由艺人林盛斌（Bob）、梁烈唯、范振锋、王梓轩及陈国峰主持的无线节目《兄弟帮》，入围今年无线《万千星辉颁奖典礼2018》的「最受欢迎电视拍档」候选之一。众人齐齐出力拉票，日前他们拍了一条诚意十足的宣传片，Bob接受东网访问时表示：「我哋节目做咗9年、超过2000集，提名过三次同类奖项，但我哋一向冇乜野心，所以一直冇拉票。今次我哋班兄弟虽然各有各忙，但遇到个好好嘅拍摄团队帮手，所以拍咗条片，畀锺意睇我哋节目嘅观众Like吓，又可以当系拉票。虽然未必有机会赢，但叫尽啲力、集啲气去拉吓票答谢观众，我哋睇完条片都几感动！」

麦浚龙企划谢安琪同古天乐合唱一定掂

歌手谢安琪（Kay）与麦浚龙（Juno）现身电台宣传新碟，二人透露新碟推出就已经迅速售罄， Kay说：「我都买唔到，我都系苦主。」Juno则多谢买碟的朋友，而周五就会加印第二批：「只碟嘅故事架构好长，今年5月开始plug歌，透过MV、文字去表达，呢个系一个横跨两年嘅企划，香港比较少呢种音乐企划，今次系Part 1，Part 2一路进行中。」

讲到其中一首歌是Kay和古天乐（古仔）合唱，问Part 2会否再邀请对方合作？Juno透露将会有很多新的角色参与，因为人生应该要有好多不同角色，明年将会是忙碌的一年，要花一整年时间宣传新碟，并计划透过影像和相展来表达故事。

至于古天乐因为这半首歌而入围乐坛颁奖典礼，更被看好夺得男歌手奖，问二人是否投古天乐一票？Kay笑说：「好戥佢开心，我有亲自同佢讲辛苦晒，佢都唔知点解反应过来，证明佢喺唔同嘅界别都好受欢迎，佢真系做得好好，其实首歌推出嘅时候，我已经好深信会得，因为好多人翻唱，佢系好适合做呢个MV角色。」身为监制的Juno就表示由第一日开始已经觉得古天乐是最适合的人选，没有人能够唱出他的味道。

Juno还揭露古天乐录音时的情况：「我真系要同佢讲声唔好意思，因为想佢有嗰种陌生感，所以我Book最早嘅录音室，朝早九点就开始，但佢真系录得好顺利，好快就做到我想要嘅感觉。」

问会否签古天乐成为旗下歌手，并为他推出个人专辑？Juno表示：「咁就要问番佢喇。」问可会找古天乐拍MV添食？Kay即搞笑说：「故事情节就发展到我同Juno得重病死咗，咁就剩番佢一个，我哋得急病成就佢。」